नाशिक हादरले! अमेरिकेहून परतला अन् काळानं घाला घातला; २४ वर्षीय तरुणाचा भीषण अपघातात मृत्यू
नेमकी घटना काय?
जेल रोड येथील धनराजनगर भागात राहणारा शंतनू जयंत बुऱ्हाडे (वय २४) हा उच्च शिक्षणासाठी अमेरिकेत होता. दोन दिवसांपूर्वीच तो आपल्या घरी परतला होता. शनिवारी (४ एप्रिल) दुपारी शंतनू त्याच्या दोन मित्रांसह गंगापूर बॅकवॉटर परिसरात फिरण्यासाठी गेला होता.
रात्री साडेआठच्या सुमारास फिरून परतत असताना, गिरणारेकडून नाशिककडे येताना हॉटेल गंमत-जंमत जवळ चालकाचे कारवरील (MH 46, Z 0067) नियंत्रण सुटले. भरधाव वेगातील कारने अनेक उलट्या घेतल्या आणि ती रस्त्यालगतच्या झाडावर जाऊन जोरात आदळली.
कारचा चक्काचूर, शंतनूचा जागीच मृत्यू
हा अपघात इतका भीषण होता की कारचा अक्षरशः चक्काचूर झाला. यामध्ये शंतनूच्या डोक्याला आणि शरीराला गंभीर दुखापत झाल्याने त्याचा जागीच मृत्यू झाला. कारमधील त्याचे इतर दोन मित्रही गंभीर जखमी झाले असून, त्यांच्यावर खासगी रुग्णालयात उपचार सुरू आहेत.
एकुलत्या एक मुलाच्या निधनाने परिसरात हळहळ
शंतनू हा जयंत बुऱ्हाडे (इंडिया सिक्युरिटी प्रेस कर्मचारी) यांचा एकुलता एक मुलगा होता. अमेरिकेहून परतल्यानंतर अवघ्या ४८ तासांत त्याच्यावर काळाने झडप घातल्याने संपूर्ण नाशिक रोड परिसरात शोककळा पसरली आहे. नाशिक तालुका पोलीस ठाण्यात या अपघाताची नोंद करण्यात आली असून अधिक तपास सुरू आहे.
अशा घटनांमधून पुन्हा एकदा वेगावर नियंत्रण ठेवण्याचे महत्त्व अधोरेखित झाले आहे. मझा अपडेटच्या सर्व वाचकांना विनंती आहे की, वाहन चालवताना सुरक्षिततेची काळजी घ्या.
thanks for comment.